mercoledì 8 ottobre 2008

Intervista a Giovanni Maier, grande contrabassista bisiac


La óse secreta del lirón.
Intervista in bisiac a Giovanni Maier




Nato a Staranzano il 26 agosto del 1965, Giovanni Maier è uno dei musicisti più apprezzati nel panorama del Jazz nazionale e non solo. Diplomatosi nel 1988 in contrabbasso presso il Conservatorio "G. Tartini" di Trieste, ha effettuato finora numerosi concerti e sedute in sala di registrazione con i più famosi musicisti italiani e stranieri ( E. Rava, G. Trovesi, C. Taylor
Da sempre molto legato alla Bisiacarìa, nell'agosto del 2005l'abbiamo incontrato nella sua casa a Turriaco, dove ci ha concesso questa intervista - seria e piena d'ironia al tempo stesso come la sua persona - chiedendo se poteva essere fatta nel nostro dialetto. Potevamo non accontentarlo?


- Femo sta intervista in bisiac - cussì, come che lo posso parlarlo mi - che me piase de più.

- Mai tant ben. Par scuminziar, 'ndove te xe nassù, Giovani?

- Son nato a Staranzan (in casa tra l'altro, penso un dei ultimi de la me generazion), de 'na faméa de origine istriana, de Visinada d'Istria, che la ga de le origini strane, parchè prima 'ncora xe un ramo che 'l xe rivà in Istria de l'isola de Creta, in Grecia, e un altro ramo, inveze, de la Carinzia, che sarìe anche quei che i ghe ga dà al nome; dopo xe 'ncora altri parenti veneziani e croati, slavi.

- E como i xe rivadi qua?

- I xe rivadi qua co'l esodo, co'la prima butada, me par ta 'l '48. Xe un poc un missiot de raze strane...

- Ma, vignindo de 'na faméa de fora, che raporto te ga vu cu'la Bisiacarìa?

- Ma, mi penso come quel de qualsiasi altro muleto bisiac. Mi son nato qua, ma credo che se xe sta qualche caso de confliti tra i vari grupi, penso che 'l sie sta - ma no son tanto informà su questo - subito, a l'inizio, ta i ani Cinquanta insoma.
Par mi penso che xe sta normale.
Mi me sinto bisiac al cento per cento.

- Quando, 'nveze, te ga scuminzià a sonar?

- Ma la musica, vara, la go scoperta grazie a me papà. Me papà al sonava al clarìn, la fisarmonica; cussì, musica de bal, insoma, gnente de tal, parò xe sta 'nportante parchè mi ero picio, varò vù sei ani, sete, e go comincià a sonetar un pochitin la fisarmonica ma, più de tuto, xe sta 'nportante che 'l me ga comincià a insegnar a lèger la musica. Dopo, go comincià a studiar più seriamente ma son partì con una base zà bastanza bona.

- Cussì te xe partì de la musica popolar...

- Sul principio sì; po, disemo sui dodici ani, go comincià a sonar con un grupeto che gavemo messo su con altri muli de la me età. Cussì go vu come una spinta verso i altri giovani e 'l mondo de la musica; prima, inveze, lo sintivo quasi come un dover, cioè no me vigniva mai voia de sonar a casa. Invece go comincià propio a aprezar tanto al fato de sonar quando che go comincià a sonar con altri muleti de la me età. Anche se lo stesso se faseva musica de balo, tanto che 'l nostro debuto xe sta a la festa de San Pietro e Paolo a Staranzan. Gavevo dodici ani e iera al '77, '78.

- Ma par ti, un musicista, vìvar in un logo como sto qua, che par tanti ani al xe sta taià fora de le grande mostre, dei grandi conzerti, como te ga vivù sta roba?

- Mi devo dir che son sta furtunà, parchè me go senpre trovà ta i posti giusti co'le persone giuste parchè, per esenpio, zà a la fin dei ani Setanta, primi ani Otanta, vemo conossù altri musicisti qua de Staranzan tipo Daniele Bulfone e Francesco Cechet e gavemo formà al nostro primo grupo che 'l se ciamava "Kashmir" e po go sonà anche coi "Slap". Iera insoma, persone preparade che se podeva sonar ben insieme, cominciava a vignir fora un pochi de musicisti; forse qualche ano prima, no so, iera più dificile. Iera più dificile, come che xe 'ncora, trovar 'ndove poder sonar: par dir, spesso se trovavisi a sonar in situazion assurde, par le feste de l'Unità par esenpio, 'ndove la gente la ne diseva: "Basta sonar ste robe qua, fene un bel valzer!" Ne xe capità tante volte!
Devo dir che mi a sedici ani, me go iscrito al Conservatorio a Trieste e anche lì go conossù musicisti par sonar insieme e tra l'altro, iera un pianista de Trieste che 'l se ciamava Paolo Longo che 'l iera propio un genio e adesso al vive in Francia e 'l fa 'l diretor de orchestra lavorando par l'Opera de Lione. E lì gavemo messo su un altro grupo che 'l se ciamava "Transition Jazz Group". Con lori semo 'ndadi vanti un bel po' e lì gò inparà davero tante robe anche parchè se trovavimo due, tre volte per setimana a provar. E anche xe sta tant inportante al fato che gavevo conossù dei musicisti del Piemonte, de Ivrea, e perciò go comincià a sonar con questi qua. Cussì me ga fat ben anche canbiar aria, conossar musicisti novi, e dopo, grazie a questi, go conossù altri ancora. Perciò, insoma, se xe 'na roba che son content xe sta che, presto, go comincià sonar in tante situazion diverse. No son mai sta un fedele, fedele a 'na situazion sola, ma son senpre sta curioso de far tante robe diverse e con musicisti diversi e credo che sie 'ncora la miglior magnera par inparar nove forme.

- Quale xe sta lora le to tape più 'nportante?

- Disemo, insoma, de sicur una de le tape più 'nportanti xe sta sto grupo al "Transition Jazz Group" a Trieste, che gavemo fato anche 'l primo disco, che iera un lp, ta 'l '86. Po anche sto altro grupo con sti muli piemontesi de Ivrea, che 'l esiste ancora, e che colaboro ogni tanto, e che 'l se ciama "Enten eller". Dopo quando che go conossù Enrico Rava e go comincià sonar coi "Eletric five".

- Lori in che ano?

- Mi Rava lo go conossù ai seminari de Siena, "Siena Jazz", che son 'ndà far come alievo ta 'l '91. Dopo lui ghe piaseva come che sonavo e 'l me ga ciamà a sonar in dele situazion sue, cussì subito dopo, ta 'l '91, '92. Però 'l grupo "Electric five" propio, al xe nato a fine '93 e 'l xe durà oto ani fin al 2001.

- Ma come xe nassù sto grupo? Iera una roba de tuti o un só proget?

- No, 'l xe nassù per tape. In principio mi e Gandhi gavemo organizà de ste parti dei concerti e se ciamava Rava come ospite e lui 'l vigniva senpre volentieri. Dopo, a un certo punto, al ne ga dito: "Ma parchè no ciamemo anche sto chitarista che 'l vive a Bologna, ma 'l xe sicilian, che 'l se ciama Domenico Caliri?". Bon, gavemo fato un pochi de concerti in quarteto; e dopo al ga dito: "Sarìa bel far anche con due chitare, con un altro chitarista de Milan, Cecchetto". Insoma, mi e Gandhi gavemo organizà una picola tournè, cussì, de prova, e gavemo sonà un po' in Slovenia e un po' qua in Region. Insoma a Rava ghe xe piasù e, po,'l xe diventà 'l só grupo e 'l ga comincià a trovar lui i concerti.

- E cun sto grupo gavè zirà al mondo...

- Ma sì, semo stadi, in Italia, in pratica dapertuto; no so, in oto ani quanti concerti, qualche centinaio. A l'estero gavemo sonà bastanza in Francia, Germania, e po semo stadi una volta in Canada e semo stadi una volta in Giapon. Sì, gavemo girà, insoma...

- Dopo quel te ga pensà de portar vanti dei progeti più tui, no?

- Sì. Disemo che xe sta inportante per mi l'esperienza del contrabbasso solo che xe ormai più de dieci ani che la stago portando vanti e go publicà cinque album. Adesso vignarà fora anche un novo. Par mi xe un banco de prova, publicar, mostrar le robe nove magari che go fato in un periodo. Difati 'l primo album al xe fato de registrazioni fate a casa, con "dat", casalinghe: difati al se ciama Polaroid, come per sotolinear che xe quasi un block-notes, fato de apunti, un diario. Po go fato dele robe con l'eletronica, me piasessi far de le sovraincisioni. Xe inportante, per mi, 'l contrabbasso solo.
E dopo, una esperienza mia che son ligà, xe questo grupo, un sesteto che 'l se ciama "Mosaic Orchestra". Con lori go fato due dischi ma, purtropo, pochi concerti perchè xe dificile far concerti con un grupo con cussì tante persone. Sarìe forse più facile ciamando l'ospite famoso; ma mi ghe tegno a lavorar con artisti che ghe sie un raporto de amicizia, ma anche de continuità artistica, de frequentazion, eco.
Po un'altra roba inportante xe che xe de sei ani che sono con sta orchestra che la se ciama "Italian Instabile Orchestra", una orchestra che la ragrupa una ventina de musicisti italiani che i vien de tuta Italia, de la Sicilia, Bari fin a Torino, Milano, 'ndove che xe i musicisti più 'nportanti del jazz de avanguardia: dei nomi storici ( anca se qualchidun coi ani al se ga tirà forà per motivi de salute o per far altre robe) come Mario Schiano, Gaslini, Renato Geremia che i xe de la generazion de setanta, setantacinque ani cussì, e po xe Trovesi, xe Schiaffini, Colombo e altri. Sta qua xe 'na roba inportante, 'na bela esperienza anche perchè go scrito dei tochi per sta orchestra, xe bel perchè li dirigo anche, sono ta i tochi dei altri, xe anche un bel esperimento, esperimento per modo de dir insoma, perchè xe quindici ani de atività che ga ormai sto grupo. Xe un orchestra 'ndove che no xe sti leader, no xe un capo, un'orchestra democratica. Noi gavemo un'associazion con un diretivo che elegemo ogni tot ani, quindi xe una roba a gestion de tipo assolutamente democratica, 'ndove che no xe leader nè artistici nè aministrativi. Semo pena stadi in Canada, gavemo fato una tournè a lulio, e gavemo girà bastanza in tuta Europa, in Giapon, e po 'ndaremo in Turchia e in Inghiltera, in otobre e novembre, con una tournè promossa del "British Art Council".
'Na banda de mati! (sorride).

- Ti, Giovani, te ga sonà anca cu'l grupo del musicista Romano Todesco, fando belone musiche dei Balcani e tradizionai. Como te vede dès, dopo tanti ani, la musica popolar?

- Devo dir che la musica del grupo che te ga cità ti, che 'l se ciama "Taximi", no, che fasemo musica balcanica, xe 'na musica che la sinto tanto vicina a mi, anzi, xe una de le robe che le me emoziona de più, come ascoltator. Me succede tanto de più de emozionarme ascoltando musiche che le vien dei Balcani che no sintindo, ad esempio, un disco de jazz. Chi sa, forse me xe restà ta 'l DNA un po' de DNA greco, no so. Comunque me piase tanton scoltarla, me diverte sonarla, no posso dir che xe la me massima espression perchè la me colocazion artistica xe un'altra. E po anche 'l jazz xe 'na musica de contaminazion, xe un ibrido, zà ta i ani Dieci, Venti 'l nasse come un ibrido e, ogi, l'unica magnera per tignirlo vivo xe contaminarlo, sporcarlo con altre robe. Per quel xe tanto inportante apunto avvicinarse a tante esperienze musicali diverse tra de lore, sia diverse tra de lore ta 'l spazio, come pol éssar le musiche de tanti posti del mondo, ma anche ta 'l tenpo. Mi, ad esenpio, me piase tanton sonar musica de New Orleans, musica de l'inizio del jazz, dei ani Venti ad esempio, e gavevo un grupo che se faseva queste musiche ani fa, un grupo mio. De sti tenpi xe diventà un poco de moda questa musica meticcia, la contaminazion, le cose multimediali insoma, e spesso sucede che qualchidun 'l vende de le monade spaciandole per robe multimediali, musiche de confin, musiche de incrocio. Bisogna star atenti. Nonostante questo, xe tanto inportante secondo mi, sopratuto de parte de un jazzista, saverse raportar con esperienze diverse, perchè 'l jazz 'l xe nato de una operazion de incrocio, xe un ibrido 'l jazz zà come partenza. Quindi 'l ga de continuo de inbastardirse con altre robe.

- Ani fa te ga, a sto proposito, musicà una poesia in bisiàc...

- Iera un periodo che iero tanto interessà a la conposizion. Mi son senpre sta un improvisator, come aprocio a la musica, no; fin de picolo me piaseva metarme su la pianola de me papà e meterme a inprovisar senza saver quel che favo, e varò vu sete ani. Cussì se un al me domanda quala che xe la me carateristica principal come musicista, mi ghe rispondo che mi son un inprovisator. Parò spesso se xe atrati del contrario de quel che se xe e lora, per un periodo, sei ani fa, me iero entusiasmà de scriver de le robe più struturade. Anche un jazzista scrive de le musiche, ma spesso xe dei temini, dei spunti per inprovisar. Invece in quel periodo me interessava una scrittura più consistente, come durata, rispeto a le robe che scrivevo prima. Ad esenpio gavevo scrito due conposizioni per pianoforte a quatro man per dei amici, per Maria Pavan e Ugo Boscain, che le xe stade anche rapresentade a Foian, ta la cesa de Santa Maria in Monte.
E dopo xe sta questa conposizion pe'l coro Elianico, su la poesia in bisiàc "Al zardìn". In sto caso go lavorà in magnera spontanea, go messo zò sul pentagrama de le note che me piaseva, ghe go tacà un testo che me piaseva, però senza nissun progeto preciso anche perchè iera la prima volta che scrivevo per coro. Forse anche per questo xe vignù un toco dificile, me rendo conto; comunque in quel periodo, e ancora desso, iero e son interessà a quele sonorità de acordi dissonanti, de intervali tanto streti. Armonicamente se basava tuto su una nota e de le fughe de sta nota per poi tornar a sta nota. Perciò se creava spesso dei acordi de note tanto dissonanti fra de lore come do, do diesis, re, mi bemolle sovraposti che xe tanto dificili de eseguir propio perchè se ti te deve cantar un do, e vicin te ga un che canta do diesis, xe dificile, no.

- Ma como te vede ti la Bisiacarìa?

- Iera, come xe 'ncora, 'na granda voia de divartirse, insoma de star insieme. Dal punto de vista sociale, me par che sìe molto ben, la nostra zona, forse senza preocuparse più de tanto de le propie radise, no. Questo no xe, tra l'altro, negativo a tuti i costi; anzi, forse in una situazion de questo tipo ghe xe più spazio per far robe nove piutosto de 'na zona massa caraterizada de 'na tradizion che xe tropo dificile distacarse.

- Una zona pìciula ma piena de talenti...

- Xe un saco de musicisti, artisti. De sicuro xe un fermento musicale de un bel po' de tenpo, dieci, anche quindici ani, no sol ta 'l canpo del Jazz. Musicisti otimi, in proporzion a la popolazion del teritorio, rispeto anche a cità come Trieste.

- Al problema xe che, fina dès, i bisiachi no i ga rivà mai farse cognossar più de tant. Ta la puisia, la musica, la pitura xe tanti artisti che no i ga gnente de invidiar a tanti altri de la region, no te pense?

- Forse xe anche ta 'l caratere del bisiàc, un pochetin, de no vèr pe'l cul, no; te fa 'na roba, po, sì, bon te la lasse star; no 'l se ronpe tant par farse conosser. Invece, magari, al triestin, al furlan i xe un poc più anbiziosi. Forse, eco, semo gente che no ga tanta anbizion. No, va ben? Bon, vado in privata, chi se ne frega... (ride).

- Dovarìssi éssar noi, par primi, a valorizar i nostri talenti. Inveze, tante volte, pur vendo i spazi, i vari artisti de la Bisiacarìa de spes i xe poc o gnente calcoladi. Magari i li ciama par dut vìa pa'l mondo ma qua i bisiachi no i sa gnanca che i siste. Ti, prasenpio, te xe sta ciamà a 'naugurar "Udine Jazz", sonando prima dei più grandi sonadori de jazz del mondo, e un grando conzert in Bisiacarìa no te lo ga fat far mai nissun. Epur, ta 'l domilaeun, la rivista "Musica Jazz" la te veva nomenà como un dei mei musicisti Jazz talian de quel ano...

- Al problema vero xe che a tanti musicisti bravi no corisponde assolutamente altretante oportunità de sonar. De far conosser i nostri lavori. La verità xe che quel poco che vien fato de bon, con gente de qua, xe solo grazie a poche persone iluminade.

- Instes te ga senpre rivà vìvar fando sol al musicista. 'Na bela sudisfazion.

- Mi, per fortuna, devo dir che lavoro tanton, anche perchè 'l contrabasso xe un strumento tant richiesto. No esiste un grupo jazz 'ndove che no ghe sie al contrabasso. Spero che sìe anche perchè sono ben! I problemi, i dubi i xe 'nvece per quel che riguarda la pension dei musicisti. Esiste sto ente che 'l se tratien una percentuale sui nostri cachet pari al trenta per cento, e xe soldi che noi no vedaremo mai, perchè i vien distribuidi sol a quei artisti che i fa più, credo, de centoventi giornade lavorative a l'ano. Che xe tante, per un musicista, perchè, almeno che no te sone con un orchestra stabile, o che te sone con un grupo de liscio che sona tuti i giorni, no, xe dificile sonar centoventi giornade in un ano. Magari sucede de sonar tante de meno, magari anche ben pagade, ma 'l fato xe che se ti no te ragiunge sto teto te xe taià fora del tuto de la spartizion de sti soldi. E xe soldi che i ne vien ciolti de la nostra paga per gnente, e xe tanti, quasi un terzo de quel che ciapemo.
Xe 'na roba assurda e che bisognarìa canbiar. Anche perchè, se le robe le 'ndarà vanti cussì, mi sarò costreto a sonar fin che no crepo. Che, insoma, per l'amor de Dio, mi spero de crepar sul palco! (ride).
Comunque no me lamento. Quel che me piasarìe, sì, sarìe sonar de più con progeti mii.





Al zardìn
di Ivan Crico


Un coro de óse
defonte, sotonote,
al torna tremar
como un sgrìsul
in ta i zai smaciadi
de verdo e l’òcria

rùzin de le fòie
cascade, ’ntant che ’l vèl
fis del scur al ’ngulùza
a pian al zardìn
cunpién de l’àiar
de quel che l’era.

Il giardino. Un coro di voci / defunte, all’imbrunire, / ritorna a tremare / come un brivido / nei gialli macchiati / di verde e l’ocra // rugginoso delle foglie / cadute, mentre il velo / fitto del buio avvolge / lentamente il giardino / pieno dell’aria / di ciò che era.

Nessun commento: